Zi në familjen e ish ambasadorit shqiptar në Itali, Llesh Kola. Fleura, vajza e tij 29-vjeçare ka ndërruar jetë në një aksident rrugor të ndodhur gjatë mbrëmjes të së enjtes në Mullet, në aksin rrugor Elbasan-Tiranë.
Pas përplasjes me një tjetër makinë, Fleura Kola ka mbetur e bllokuar brenda automjetit. Për nxjerrjen e trupit të saj nga makina është nevojitur ndërhyrja e forcave zjarrfikëse. Fleura Kola mori dëmtime të forta në kokë të cilave nuk mundi t’i mbijetonte. 29-vjeçarja mbërriti e pajetë në spital.
Ajo udhëtonte në një makinë me gazetarin Çim Peka, që ka pësuar dëmtime të rënda në gjymtyrë, por ndodhet jashtë rrezikut për jetën. Ai u dërgua menjëherë në spitalin e Traumës ku iu nënshtrua një ndërhyrjeje kirurgjikale.